Rasteqîn Welatperwer Komo?         

Ez tay merdemon ra reka zî fom nikena! Ez yın ra zaf eciz bena û buyê mı beno teng. Yani ez kılmek vacî, ez ın insanon ra zaf şaş û mat manena! Eger şıma mı ra vaciyên “çira tu hına zaf zêrde-zendı maneni ın insanon ra?”, ez hına bersiv bidî şıma:

Ercîyayî merdem yo Kurd; gera pe yo usûl, pe yo fend, pe yo terbîya û pe yo ehlaqê rind şarê xo ra mînak bo.

Pe vatê, yo zî pe qesanê vengon merdem yo çi nîbeno û nîrêşeno yo cazî. Her çi merdem xesûd û qarwîzek nîbeno însan, ni beno Kurd û ni zî beno yo gı!

İn merdem bî kar, bî gurî û bî emel bereday-bereday jîyon kenê! Ser sosyal medya sera dewlet ava kenê û dewletê şonî ra(!) Yani kılmek vacî se, her roj yo fantazî vırazenê û pe ın xeyalon rojonê xo vîyarnenê ra.

Ez qayıl a ın merdemonê çepelon û xırabon şarê ma rî bınê bıdî şınaskerdış: Dı tewer merdem ser sosyal medya ser xırabî kenê û çiyo baş û rind şonî ra.

Yo qısım merdem pe nome sosyalîzm mıjarê raştîya civak a Kurd donî naskerdış, pe ın îdeolojî ye kon xo rî berê iqbal kenê a.

Yonê tewer kesî estê pe nome millet-perwerî, yon zî pe nome kurdayetî gengeşî ve çepelî vıla kenê.

Teşbîh dı xeterî nîb se în kes merdem wadon Twitter grup-grup, qefle-qefle, qısım-qısım resenê yo ca û zê lasêr xo werdenê ra. Raştî zî în merdem xesûd pe nome Kurdistan her çi verden wêrî, her çi ser û bın kenê, her çi kenê tîmon ya û her çi lawêtnenê.

Xelbukî rasteqîn welatperwer merdem ava keno, ercîyayî beno, hol beno, baş beno, rind beno, mînak beno, merdem gıron û zonayî beno.

Dayıka mı a rehmetî semedê ehmeqon û xırabon co bilaseba; “hay lımenê hay lımenê” nîvaten.

Vate mı a peyên, ez qayıl a şıma ra zaf hes bıkerî. Ez qayıl a alîkarî şıma bıkerî û barê şıma şenık bıkerî. Lebele nafîlo! Mı zaf tesel kerd û mı hîvya xo şıma ra bırna! Çimkî şıma zaf çîyon nîvînenî, yers û xesudî çimê şıma kerdî kuar.

Ez şıma ra vacî se nafîlo! En holî ez qarşî şıma fekê xo bıqefel, şıma nîawel û gera ez şıma ra xo bıpaw.

Kadir Amaç-Brüksel